Дар Муассисаи давлатии “Озмоишгоҳи миллии референсӣ” маросими ифтитоҳи даври омӯзишии Созмони умумиҷаҳонии тандурустӣ (СУТ) оид ба интиқоли бехатарии моддаҳои сироятӣ баргузор гардид, ки дар он муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода, мутахассисони озмоишгоҳҳо ва намояндагони ТУТ дар Тоҷикистон иштирок намуданд.
Абдухолиқ Амирзода дар суханронии худ аҳамияти риояи қатъии талаботи байналмилалӣ ва миллӣ дар ҳамлу нақли моддаҳои сироятӣ тавассути нақлиёти ҳавоӣ, автомобилӣ ва роҳи оҳанро таъкид намуда, дар сурати нақзи ин қоидаҳо хатарҳои эҳтимолӣ ба саломатии инсон ва муҳити зистро қайд кард. “Таълими мутахассисон дар ин самт калиди беҳбуди техникаи бехатарӣ, риояи тамоми муқаррарот ва таъмини зудтари маводҳои биологӣ мебошад”, – гуфт номбурда.
Бояд қайд кард, ки даври омӯзишӣ аз ҷониби корманди техникии ТУТ оид ба масъалаҳои лабораторӣ Карен Нахапетян дар доираи чаҳорчӯбаи омодагӣ ба зукоми пандемиявӣ гузаронида шуда, дар он мутахассисони тамоми минтақаҳои ҷумҳурӣ дар соҳаи ташхиси озмоишгоҳӣ ва бехатарии биологӣ иштирок намуданд
